Autoritetet e Talibanit në Afganistan kanë miratuar një sërë rregullash të reja që kufizojnë më tej të drejtat e grave dhe vajzave, që nga rikthimi i tyre në pushtet në gusht të vitit 2021.

Së fundmi, vëmendja ndërkombëtare është përqendruar te një rregullore e re prej 31 faqesh, e titulluar “Parimet e Divorcit midis Bashkëshortëve”, e cila përcakton dispozita të detajuara mbi martesën, divorcin dhe marrëdhëniet familjare. Dokumenti përfshin rregulla që lidhen me martesat e hershme, kujdestarinë familjare dhe konceptin e “virgjërisë”, duke ndezur debat të gjerë në opinionin publik dhe në organizatat ndërkombëtare.

Sipas raportimeve, rregullorja përfshin edhe konceptin e “khiyar al-bulugh”, i cili i jep një personi të drejtën të kërkojë anulimin e një martese të lidhur gjatë fëmijërisë pasi të arrijë moshën e pubertetit, por vetëm përmes vendimeve gjyqësore.

Në disa raste, prindërit dhe kujdestarët kanë rol vendimtar në martesat e të miturve, ndërsa gjykatat mund të ndërhyjnë vetëm në kushte të caktuara, përfshirë abuzimin ose paaftësinë e kujdestarëve. Një prej pikave më të diskutueshme mbetet interpretimi i “heshtjes së vajzës së virgjër” si miratim për martesë, një dispozitë që ka ngjallur kritika të forta nga organizatat e të drejtave të njeriut.

Dokumenti përfshin gjithashtu rregulla që lidhen me mungesën e bashkëshortëve, pretendimet për tradhti bashkëshortore dhe çështje të apostazisë, duke i dhënë gjykatave kompetenca të gjera në zgjidhjen e mosmarrëveshjeve familjare.

Organizatat ndërkombëtare të të drejtave të njeriut kanë shprehur shqetësim të vazhdueshëm, duke e cilësuar situatën e grave në Afganistan si një regres serioz në liritë dhe të drejtat themelore.