Një bandë shqiptarësh, e konsideruar nga autoritetet italiane si “terror” për bizneset e vogla në jug të Italisë, ka rënë në prangat e policisë pas një operacioni të gjerë të Karabinierëve.

Sipas hetimeve, grupi prej katër personash dyshohet se ka kryer të paktën 34 grabitje dhe tentativa grabitjeje në periudhën shkurt 2023 – mars 2024, duke shënjestruar kryesisht dyqane që tregtonin cigare, bileta lotarie, pulla fiskale dhe produkte të tjera të licencuara nga shteti italian.

Autoritetet italiane bëjnë me dije se banda vepronte në disa qytete dhe zona rurale, përfshirë Venosa, Melfi, Rionero in Vulture dhe Lagonegro në rajonin e Basilicatës, si edhe në Sala Consilina, Foggia dhe Frosinone.

Sipas policisë, hajdutët monitoronin më parë objektivat e tyre dhe më pas hynin në aksion gjatë natës, duke thyer dyert e bizneseve për të grabitur cigare, para cash dhe bileta lotarie të çastit, të cilat më pas shiteshin në tregun e zi.

Dëmi ekonomik i shkaktuar ndaj bizneseve italiane llogaritet mbi 300 mijë euro.

Karabinierët e kanë cilësuar grupin si një organizatë kriminale të strukturuar mirë, e cila lëvizte vazhdimisht nga një qytet në tjetrin për të shmangur identifikimin dhe arrestimin.

Lidhur me operacionin ka reaguar edhe Komandanti Provincial i Karabinierëve të Potenzës, Kolonel Luca D’Amore, i cili theksoi rëndësinë e bashkëpunimit të qytetarëve me autoritetet.

“Rezultati i operacionit tregon reagimin institucional shumë efektiv të ofruar nga shteti ndaj nevojave për mbrojtjen e qytetarëve dhe ekonomisë. Ftoj qytetarët të raportojnë çdo aktivitet të dyshimtë përmes numrit të emergjencës 112,” deklaroi ai.