Një aksident me pasojë fatale është regjistruar pasditen e së mërkurës në aksin kombëtar Librazhd–Prrenjas, në zonën e njohur si “Ura e Spatharit”, ku një këmbësore ka humbur jetën pas përplasjes me një automjet.

Viktima është identifikuar si shtetasja Heidije Bajrami, rreth 65 vjeçe, e cila është goditur nga një automjet tip “Toyota” që drejtohej nga shtetasi Xheladin Omeri.

Sipas burimeve nga vendngjarja, përplasja ka qenë e fortë, duke i shkaktuar të moshuarës dëmtime të rënda. Ajo është transportuar me urgjencë drejt spitalit bashkiak të Librazhdit, por ka mbërritur pa shenja jete.

Menjëherë pas ngjarjes, forcat e policisë kanë mbërritur në vendin e aksidentit dhe kanë nisur hetimet për të sqaruar dinamikën dhe shkaqet e përplasjes. Ndërkohë, drejtuesi i mjetit është shoqëruar dhe po merret në pyetje.

Autoritetet vijojnë punën për zbardhjen e plotë të rrethanave të kësaj ngjarjeje tragjike.