Një incident i pazakontë ka shkaktuar reagime në Britani, pasi një radio lokale transmetoi gabimisht lajmin për vdekjen e Mbretit Charles III, duke u detyruar më pas të kërkojë falje publike.

Ngjarja ka ndodhur në radion Radio Caroline, e cila operon në juglindje të Anglisë. Sipas drejtuesve të saj, gabimi është shkaktuar nga një problem teknik në sistemin kompjuterik të studios, që ka aktivizuar aksidentalisht një program të posaçëm emergjent.

Drejtori i radios, Peter Moore, shpjegoi se bëhej fjalë për një defekt në kompjuterin qendror, i cili ka çuar në transmetimin e një njoftimi të parapërgatitur për rastet ekstreme.

“Programi ‘Monarku’, që të gjitha radiot britanike e kanë të gatshëm dhe shpresojnë të mos e përdorin kurrë, u aktivizua gabimisht dhe u transmetua lajmi i rremë për vdekjen e Mbretit”, deklaroi Moore.

Pas incidentit, radioja kërkoi falje publikisht si në transmetim ashtu edhe në rrjetet sociale, duke e cilësuar ngjarjen si një gabim teknik dhe të paqëllimshëm.

Ironikisht, në momentin e transmetimit, Mbreti Charles ndodhej në një vizitë zyrtare në Irlandën e Veriut, duke vijuar agjendën e tij publike.

Monarku 77-vjeçar kishte bërë të ditur në vitin 2024 se po i nënshtrohej trajtimit për një sëmundje onkologjike, çka ka shtuar më herët vëmendjen mediatike rreth gjendjes së tij shëndetësore.