Ish-drejtoresha e Agjencisë Kombëtare të Shoqërisë së Informacionit (AKSHI), Mirlinda Karçanaj, është paraqitur këtë të hënë në ambientet e SPAK, në zbatim të masës së sigurisë “detyrim paraqitje”.

Sipas burimeve, Karçanaj është paraqitur e shoqëruar nga avokatja e saj, ndërsa masa ndaj saj është zbutur më herët nga “arrest shtëpie” në “detyrim paraqitje”, pas vendimeve gjyqësore të fundit.

Pas daljes nga ambientet e SPAK-ut, ajo nuk ka pranuar të japë deklarata për mediat, pavarësisht interesit të gazetarëve, ndërsa avokatja e saj është shprehur se do të flasë në një moment tjetër.

Karçanaj po hetohet në lidhje me procedura tenderimi në AKSHI, ndërsa në dosje janë përmendur pretendime për parregullsi në prokurime dhe ndikim në proceset e tenderëve publikë. Ajo i ka hedhur më herët poshtë akuzat gjatë një interviste televizive.

Hetimet e SPAK vijojnë, ndërsa çështja mbetet në fazë hetimore dhe nën vlerësim gjyqësor.