Policia e Lezhës ka finalizuar operacionin e koduar “Perimetri 2”, duke goditur një aktivitet kriminal të shitjes së lëndëve narkotike dhe organizimit të kundërligjshëm të lojërave të fatit në qytetin e Laçit.

Si rezultat i operacionit janë arrestuar 7 shtetas, ndërsa janë sekuestruar lëndë narkotike Cannabis Sativa, 6 automjete, celularë dhe 7 pajisje elektronike të përdorura për lojëra fati.

Sipas policisë, nga hetimet dyshohet se lënda narkotike shpërndahej në zona të ndryshme të Laçit, në disa raste edhe pranë shkollave.

Operacioni u zhvillua nga Sektori për Hetimin e Narkotikëve, Seksioni i Mbështetjes Operacionale dhe Forca e Posaçme “Shqiponja” e DVP Lezhë, në bashkëpunim me FNSH Tiranë dhe Prokurorinë e Lezhës, pas disa muajsh hetime me metoda speciale.

Policia bëri me dije se u dokumentua veprimtaria kriminale e disa shtetasve që siguronin Cannabis Sativa, e ndanin në doza dhe e shisnin në qytetin e Laçit.

Gjatë operacionit u zbulua edhe një lokal ku organizoheshin lojëra fati me kompjuterë, në kundërshtim me ligjin. Për këtë rast u arrestua pronari i lokalit, i cili sipas policisë është babai i dy prej të arrestuarve dhe nuk e kishte regjistruar subjektin dhe punonjësit në organet kompetente.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë për veprime të mëtejshme.