Uashingtoni ka shprehur një optimizëm të kujdesshëm për arritjen e një marrëveshjeje që mund t’i japë fund luftës me Iranin, ndërsa pritet një vizitë e një ndërmjetësi pakistanez në Teheran për vijimin e negociatave.

Sekretari amerikan i Shtetit, Marco Rubio, deklaroi se ka pasur përparim në bisedimet indirekte mes palëve dhe se SHBA-ja shpreson që përpjekjet diplomatike të japin rezultat.

“Unë besoj se pakistanezët do të shkojnë në Teheran nesër. Shpresojmë që kjo do të lejojë që gjërat të ecin përpara”, tha Rubio përpara nisjes drejt Suedisë për samitin e NATO-s.

Sipas mediave ndërkombëtare, shefi i ushtrisë pakistaneze, Asim Munir, pritet të vizitojë Teheranin për bisedime me zyrtarët iranianë, megjithëse udhëtimi ende nuk është konfirmuar zyrtarisht nga Pakistani.

Ndërkohë, Islamabadi ka shtuar përpjekjet ndërmjetësuese ditët e fundit. Ministri i Brendshëm pakistanez, Mohsin Naqvi, ka udhëtuar dy herë drejt Teheranit për të paraqitur propozimin më të fundit amerikan, të cilin pala iraniane tha se po e shqyrton.

Megjithatë, Irani vijon të këmbëngulë në kërkesat e tij, duke kërkuar lirimin e aseteve iraniane të ngrira jashtë vendit dhe heqjen e bllokadës amerikane ndaj porteve iraniane. Autoritetet iraniane kanë deklaruar gjithashtu se “nuk do të dorëzohen kurrë” përballë kërcënimeve.

Konflikti shpërtheu pas sulmit të SHBA-së dhe Izraelit ndaj Teheranit më 28 shkurt dhe ka shkaktuar mijëra viktima, kryesisht në Iran dhe Liban, ku operon Hezbollah, aleate e Teheranit.

Presidenti amerikan Donald Trump ka deklaruar se një marrëveshje mund të arrihet shumë shpejt dhe do të shmangte kosto të mëdha njerëzore dhe ekonomike.

“Përfundimi i një marrëveshjeje do të kursente kohë, energji dhe jetë”, është shprehur Trump.

Sipas mediave amerikane, tensione janë shfaqur edhe mes Trump dhe kryeministrit izraelit Benjamin Netanyahu, pas raportimeve për një telefonatë të tensionuar mes tyre.

Ndërkohë, Irani ka zyrtarizuar krijimin e një organizate për mbikëqyrjen e Ngushticës së Hormuzit, një nga arteriet më strategjike të transportit të naftës në botë, duke shtuar shqetësimet për ekonominë globale dhe tregjet energjetike.