Deputetja e Partisë Demokratike, Ina Zhupa, ka zhvilluar sot një interpelancë në Kuvend me ministren e Arsimit, Mirela Kumbaro, ku ka ngritur akuza për mënyrën e funksionimit të Agjencisë së Shërbimeve Arsimore dhe përfshirjen e aktorëve privatë në sistemin arsimor.

Gjatë fjalës së saj, Zhupa deklaroi se institucionet publike po kalojnë në administrim të privatit dhe se, sipas saj, po cenohet interesi publik.

“Po i dhuroni pasurinë publike shqiptarëve. Është detyrë kushtetuese e juaja si ministre,” u shpreh Zhupa, duke shtuar se vendimet e fundit favorizojnë një fondacion të huaj në menaxhimin e proceseve arsimore dhe testeve ndërkombëtare.

Ajo kritikoi gjithashtu përfshirjen e Fondacionit Shqiptaro-Amerikan për Zhvillim (AADF), duke pretenduar se ai po merr rol në disa sektorë të arsimit dhe administrimit publik, përfshirë edhe procese të lidhura me testimet dhe licencimet.

Zhupa akuzoi ministren se po krijohet një precedent ku, sipas saj, funksione shtetërore po kalojnë te struktura joqeveritare, ndërsa ngriti pyetjen se pse nuk po ndiqen modele të ngjashme me vendet e Bashkimit Europian.

Nga ana tjetër, ministrja Mirela Kumbaro mbrojti projektin, duke theksuar se bashkëpunimi me AADF synon modernizimin e sistemit arsimor dhe rritjen e standardeve të shërbimeve publike.

Sipas saj, përfshirja e partnerëve ndërkombëtarë synon përmirësimin e proceseve ekzistuese dhe jo privatizimin e sistemit arsimor, ndërsa projektet në fjalë financohen dhe monitorohen në kuadër të marrëveshjeve të posaçme.