Një ngjarje shokuese ka ndodhur në Selanik të Greqisë, ku një 67-vjeçar është vrarë nga djali i tij 30 vjeç, pas një konflikti të ashpër në banesën e familjes.

Sipas autoriteteve, 30-vjeçari dyshohet se e ka goditur të atin me kaçavidë dhe stol, duke i shkaktuar plagë fatale. Ai është arrestuar nga policia dhe ndaj tij është ngritur procedurë penale për vrasje, dhunë në familje dhe shkelje të ligjit për substancat narkotike.

“67-vjeçari është gjetur i pajetë brenda banesës, me plagë që, sipas hetimeve, janë shkaktuar nga djali i tij”, bëjnë me dije autoritetet greke.

Në vendngjarje janë sekuestruar një thikë dhe një kaçavidë, të cilat do të ekzaminohen në laborator, si dhe dy kuti me tableta narkotike pa recetë mjekësore.

Ngjarja është zbardhur pasi motra e 30-vjeçarit shkoi në banesën e familjes për të kërkuar të atin, ku e gjeti të pajetë në katin e poshtëm dhe më pas vëllanë duke fjetur në dhomën e tij.

“Kur i tha se babai kishte vdekur, ai dyshohet se pranoi se e kishte vrarë pas një sherri”, raportojnë autoritetet.