“Presidenti në qendër të krizës politike në Kosovë – | Hamza: ‘Ai po kërkon nënshtrim, jo bashkëpunim’ | Osmani: ‘Rrugët e mbyllura nga frikacakët hapen nga populli’”

Një rol i konceptuar si kryesisht ceremonial ka marrë një peshë që i tejkalon vetë kompetencat e tij, duke e kthyer presidentin në nyjën e krizës politike në Kosovë dhe vendin drejt zgjedhjeve të reja, pa garanci për zgjidhje.

Sipas vëzhguesve, vota mund të sjellë rezultat vetëm në një konfigurim të caktuar – përndryshe rrezikon të riprodhojë të njëjtën bllokadë që zvarritet prej muajsh. Zgjedhjet e 7 qershorit shihen si fundi i një zinxhiri dështimesh institucionale dhe politike.

Për Lëvizjen Vetëvendosje, përgjegjësia për situatën bie mbi opozitën. “Të detyrosh një milion qytetarë të shkojnë sërish në kutitë e votimit… kjo është e pamundur”, ka thënë Albin Kurti.

Nga ana tjetër, Bedri Hamza ka deklaruar: “Ai po kërkon nënshtrim, jo bashkëpunim. Po kërkon përkrahjen tonë jo për shtetin, por për pushtetin e tij.”

Ndërkohë, Vjosa Osmani është shprehur: “Rrugët e mbyllura nga frikacakët, gjithmonë hapen nga populli dhe është populli ai që e di të vërtetën.”

Në terren, qytetarët mbeten të ndarë mes votës si obligim dhe mungesës së besimit për ndryshim real, ndërsa vendi hyn në një tjetër cikël zgjedhor brenda një periudhe të shkurtër.