Shoqëria koncesionare Vlora International Airport – VIA sh.p.k. ka reaguar pas deklarimeve të bëra publikisht nga MABCO Constructions S.A. – Degë e Shoqërisë së Huaj, duke i cilësuar ato si të pasakta dhe duke sqaruar opinionin publik mbi ecurinë e kontratës për ndërtimin e Aeroportit Ndërkombëtar të Vlorës.

Në reagim thuhet se kontrata e nënshkruar më 3 tetor 2022 dhe e amenduar më 20 shkurt 2025 ka një vlerë totale prej 62,071,030.85 euro me TVSH, duke theksuar se çdo pretendim për “qindra miliona euro investime” nuk qëndron.

Sipas VIA sh.p.k., deri më tani janë certifikuar punime në vlerë prej 24,085,241.35 euro, që përbëjnë 38.80% të kontratës. Nëse përfshihen edhe punimet e deklaruara nga kontraktori, por ende të pacertifikuara, vlera totale arrin në 26,405,857.35 euro, ose 42.54% të kontratës.

“Edhe sipas llogarisë më të favorshme për Kontraktorin, punimet nuk kanë arritur as gjysmën e kontratës”, thekson VIA sh.p.k., duke shtuar se të gjitha pagesat janë kryer nëpërmjet financimit me Bankën Kombëtare Tregtare (BKT).

Në reagim, kompania sqaron se shkëputja e kontratës nuk ka qenë e menjëhershme, por rezultat i vonesave të konsiderueshme, mosfillimit të disa objekteve, ndryshimeve të paautorizuara në projekt dhe mosrespektimit të afateve kontraktore.

VIA sh.p.k. akuzon gjithashtu kontraktorin për pengim të punës së organeve mbikëqyrëse, sjellje të papranueshme në kantier dhe vonesa të qëllimshme në dorëzimin e dokumentacionit për certifikim, duke përmendur 429 ditë vonesë dhe dëme prej 4.29 milionë euro.

“Çdo përpjekje për ta paraqitur situatën si bllokim të aeroportit është e pasaktë”, thuhet më tej, ndërsa theksohet se kompania ka ndjekur të gjitha procedurat kontraktore përpara ndërprerjes së marrëdhënies.

VIA sh.p.k. nënvizon se aeroporti është projekt strategjik kombëtar dhe mbetet e angazhuar për përfundimin e tij, duke paralajmëruar se ruan të gjitha të drejtat ligjore ndaj kontraktorit.