Pronari i kompanisë “Edal-Vlora Construction”, Eduart Alikaj, i cili ndodhet në paraburgimin e Vlorës nën akuzën për vjedhje makinerish në Itali, është dhunuar brutalisht brenda qelisë së tij.

Ngjarja raportohet të ketë ndodhur rreth orës 15:35 të ditës së djeshme, në katin e dytë të paraburgimit. Sipas informacioneve paraprake, disa të paraburgosur janë futur në dhomën nr. 11, ku ndodhej Alikaj, dhe e kanë goditur fizikisht, duke i shkaktuar dëmtime të rënda.

Në konflikt dyshohet se janë përfshirë Ardit Koçi, Amarildo Toshkollari, Marsido Alushi dhe Beqir Selami, ndërsa si iniciator i përplasjes përmendet Bebeto Basha, i arrestuar për shpërndarje droge.

Pas incidentit, protagonistët e përfshirë në ngjarje janë transferuar në institucione të tjera të vuajtjes së dënimit, përkatësisht në burgun e Reçit, paraburgimin “302” në Tiranë, Burrel dhe Drenovë.

Ndërkohë, Eduart Alikaj është transportuar drejt Spitalit të Burgut në Tiranë, ku po merr trajtim mjekësor për plagët e marra.