Thirrjet për unitet, dashuri dhe solidaritet kanë qenë në qendër të mesazhit të Myftiut të Kosovës, Naim Tërnava, gjatë ligjëratës së mbajtur të mërkurën me rastin e manifestimit qendror të Kurban Bajrami, në Xhaminë e Madhe në Prishtinë.

Para besimtarëve, Tërnava theksoi se Kosova ka nevojë për stabilitet ekonomik dhe politik, institucione funksionale dhe përgjegjësi shtetërore, ndërsa kritikoi përplasjet politike dhe interesat e ngushta partiake.

“Vendi ka nevojë për stabilitetin ekonomik e politik dhe institucione funksionale e përgjegjësi shtetërore. Fatkeqësisht, interesat e ngushta grupore, përplasjet e pafundme të partive tona, kanë lodhur qytetarët tanë dhe kanë krijuar pasiguri për të ardhmen… Nuk mund të ketë interes më të madh se interesi i atdheut”, tha Tërnava.

Ai shtoi se qytetarët janë lodhur nga konfliktet e vazhdueshme politike dhe proceset e shpeshta zgjedhore, të cilat sipas tij po krijojnë pasiguri për të ardhmen dhe po dobësojnë besimin qytetar.

Myftiu theksoi gjithashtu se stabiliteti i shtetit dhe mirëqenia e qytetarëve kërkojnë maturi, urtësi dhe vizion kombëtar, duke nënvizuar se interesat personale apo partiake nuk duhet të qëndrojnë mbi interesin e vendit.

Në një tjetër pjesë të ligjëratës, ai iu referua edhe fushatës për zgjedhjet e parakohshme të 7 qershorit, duke bërë thirrje për një proces të qetë dhe me dinjitet.

“Një fushatë e ndërtuar me përçarje dhe shpifje nuk i shërben Kosovës dhe as të ardhmes së saj. Le të mbizotërojë dinjiteti dhe kultura demokratike e dialogut”, deklaroi Naim Tërnava.