Kryeministri në detyrë i Kosovës, Albin Kurti, ka zhvilluar sot një vizitë në selinë e Bashkësia Islame e Kosovës, ku është pritur nga Myftiu Naim Tërnava, me rastin e festës së Kurban Bajrami.

Gjatë vizitës, Kurti u shpreh se kjo festë është një kujtesë për sakrificën dhe solidaritetin, duke theksuar rëndësinë e ndihmës për njëri-tjetrin dhe për të mirën e përgjithshme.

“Vizitën e parë për festën e Kurban Bajramit, si për çdo vit, këtë vit vijmë te Bashkësia Islame e Kosovës, për t’ia uruar Myftiut, Naim Tërnava dhe bashkëpunëtorëve të tij, këtë festë të sakrificës, e cila na e përkujton e vazhdimisht na e mëson që edhe sakrifica është festë… Kurban Bajrami është festë e cila na obligon të ndihmojmë njëri-tjetrin, të respektojmë njëri-tjetrin, të tregojmë solidaritet e bujari për të mirën e përgjithshme, duke mos e lënë askënd prapa”, tha Kurti.

Ai kujtoi gjithashtu sakrificën e luftës së fundit në Kosovë, duke përmendur edhe 37 imamë dhe hoxhallarë që ranë dëshmorë gjatë konfliktit.

Kurti theksoi se këto figura përfaqësojnë pjesë të rëndësishme të kujtesës historike dhe sakrificës që, sipas tij, ka mundësuar lirinë dhe zhvillimin e vendit.

Vizita e tij vjen si pjesë e urimeve tradicionale për festën e Kurban Bajramit, që institucionet e Kosovës zhvillojnë çdo vit me Bashkësinë Islame.