Detaje të reja janë zbardhur nga plagosja e një 34-vjeçari në Tiranë, i cili u paraqit rreth orës 23:55 në spital me plagë plumbi në këmbë.

Sipas të dhënave paraprake, i plagosuri, Juxhin Hamajesi, ka deklaruar para autoriteteve se ngjarja ka ndodhur pas një konflikti të çastit për motive të dobëta. Megjithatë, emri i tij nuk është i panjohur për organet e rendit dhe ka qarkulluar edhe më herët në kronikat e lajmeve.

Në vitin 2018, Hamajesi ka mbetur i plagosur në një tjetër ngjarje me armë zjarri, ku dyshohet se është qëlluar nga ish-efektivi Santiago Malko, në një lokal në zonën e Kinostudios.

Po ashtu, në qershor të vitit 2021, ai është arrestuar si i dyshuar për trafik të klandestinëve sirianë.

Policia e Tiranës bëri me dije se ngjarja e fundit ka ndodhur në rrugën “Aleksandër Moisiu”, ku dyshohet se plagosja është shkaktuar gjatë një konflikti të menjëhershëm.

“Më datë 26.05.2026, rreth orës 23:55, është paraqitur në spital për ndihmë mjekësore, i plagosur në këmbë, dyshohet me armë zjarri, shtetasi J. H., rreth 34 vjeç, i cili ndodhet jashtë rrezikut për jetën. Nga veprimet e para hetimore dyshohet se plagosja ka ndodhur në rrugën ‘Aleksandër Moisiu’ gjatë një konflikti të çastit për motive të dobëta. Grupi hetimor po vijon punën për zbardhjen e rrethanave, identifikimin dhe kapjen e autorit/ëve”, thuhet në njoftimin zyrtar.

Hetimet po vijojnë për të sqaruar nëse bëhet fjalë për një përplasje të rastësishme apo një konflikt me prapavijë më të hershme.