Drejtoria e Përgjithshme e Policisë së Shtetit ka njoftuar heqjen e licencës për dy subjekte private të sigurisë fizike, “Myrto Security 1.3A” dhe “Major Security”, pas shkeljeve të konstatuara gjatë dhe para një tubimi të mbajtur më 30.05.2026 në zonën e Portonovës, Zvërnec.

Sipas njoftimit zyrtar, vendimi vjen pas hetimeve administrative që po kryhen nga Drejtoria e Standardeve Profesionale dhe Departamenti për Sigurinë Publike, të cilat po shqyrtojnë veprimet dhe mosveprimet e subjekteve të kontraktuara për ruajtjen e objektit.

Nga verifikimet ka rezultuar se subjekti “Myrto Security 1.3A” nuk ka marrë masat e nevojshme për sigurinë e objektit dhe nuk ka zbatuar rregullat për regjimin e hyrje-daljeve të personave dhe mjeteve. Po ashtu, sipas policisë, nuk është administruar lista e personave dhe mjeteve të lejuara në territorin e mbrojtur.

“Për shkak të mospërmbushjes së këtyre kritereve, më datë 30.05.2026, janë lejuar të hyjnë në brendësi të rrethimit, persona të paidentifikuar dhe të panjohur nga personeli i shërbimit”, thuhet në njoftimin e policisë.

Hetimet administrative vijojnë për të përcaktuar përgjegjësitë e plota të subjekteve dhe çdo shkelje të mundshme ligjore gjatë ngjarjes.