Kryeministri Edi Rama ka reaguar për herë të parë lidhur me ngjarjet në Zvërnec, pas pamjeve që qarkulluan në media ku një protestues u tërhoq zvarrë nga persona të sigurisë private gjatë një proteste kundër një investimi në zonë.

Rama e cilësoi ngjarjen si të papranueshme dhe tha se e kupton reagimin e qytetarëve, duke u shprehur se do të kishte ndjerë të njëjtin revoltë nëse do të ishte në vendin e tyre.

“Lidhur me situatën e krijuar për investimin e zonës së Zvërnecit. Dhe dua ta nis me një mesazh të drejtpërdrejtë për të gjithë ata që janë revoltuar dhe janë rreshtuar edhe kundër meje personalisht, pasi panë aktin e neveritshëm të tërheqjes zvarrë të njërit prej protestuesve në Zvërnec. Ju kam dëgjuar, ju kam lexuar dhe ju kuptoj shumë mirë…”, u shpreh Rama.

Ai shtoi se situata e krijuar ishte e papranueshme, duke kritikuar edhe mënyrën e reagimit institucional në terren.

“Madje ju siguroj që në vendin tuaj edhe unë po njësoj do revoltohesha dhe do rreshtohesha kundër qeverisë dhe kundër kryeministrit sidomos…”, vijoi ai, duke theksuar se policia duhet të kishte ndërhyrë për të ndaluar menjëherë personat përgjegjës për dhunën ndaj protestuesit.

Reagimi vjen pas debatit publik të ndezur nga incidenti në zonën e Zvërnecit, ku janë raportuar tensione mes protestuesve dhe forcave të sigurisë private.