Një aksident i rëndë rrugor i ka marrë jetën një 43-vjeçari në orët e para të mëngjesit në Lushnje.

Viktima është identifikuar si Ernis Xhumari, i cili humbi jetën në vendngjarje pas një përplasjeje të fortë në rrethrrotullimin e Plasmasit.

Sipas informacioneve paraprake, automjeti tip “Benz” me të cilin udhëtonte 43-vjeçari dyshohet se lëvizte me shpejtësi të lartë. Mjeti fillimisht ka goditur bordurën e rrethrrotullimit, më pas është përplasur me një shtyllë ndriçimi dhe ka përfunduar dhjetëra metra larg vendit të impaktit.

Përplasja ka qenë fatale për drejtuesin e mjetit, i cili nuk ka mundur t’u mbijetojë plagëve të marra.

Në vendngjarje kanë mbërritur menjëherë shërbimet e Policisë Rrugore, të cilat kanë nisur hetimet për zbardhjen e plotë të shkaqeve dhe rrethanave të aksidentit tragjik.

Ndërkohë, forcat zjarrfikëse kanë ndërhyrë për pastrimin e rrugës nga mbetjet e automjetit të shkatërruar pas përplasjes.