Ministri i Drejtësisë, Toni Gogu, gjatë fjalës së tij në prezantimin e rekomandimeve para Prokurorit të Përgjithshëm Olsian Çela dhe drejtuesit të SPAK, ka theksuar se kriminaliteti rrugor duhet të trajtohet me fokus të shtuar.

Sipas Gogut, 37% e procedimeve të SPAK janë iniciuar me vetë nismë të institucionit, ndërsa ka pasur një rritje prej rreth 20% krahasuar me vitin 2024. Ai shtoi se çështjet e mbartura janë reduktuar ndjeshëm dhe para afateve të vendosura.

“Gjatë vitit 2025, ka tendenca që meritojnë vëmendje. Nga SPAK, 37 përqind e procedimeve janë regjistruar nga vetë institucioni, ka një rritje prej gati 20 përqind në raport me 2024. Çështjet e mbartura janë reduktuar ndjeshëm dhe para afatit që kishte vendosur SPAK. Vlera e aseteve të sekuestruara arrin në gati 33 milionë euro. Mbi 50 përqind e zyrtarëve të hetuar nga SPAK janë dërguar në gjykatë. 182 procedime korrupsioni janë nga Prokuroritë e zakonshme. Prokurorë dhe oficerë kanë ndjekur trajnime për të luftuar korrupsionin. Shërbimi prokurorial ka ecur në shumë tregues. Konfiskimet përfundimtare kanë nevojë për vëmendje të shtuar”, u shpreh Gogu.

Gogu gjithashtu kërkoi që qeveria të shqyrtojë ngritjen e një njësie të posaçme për hetimin e krimit kibernetik.