Nisin këtë të martë provimet e Maturës Shtetërore në të gjithë vendin. Mbi 26 mijë maturantë do t’i nënshtrohen testit të parë, atij të Gjuhës së Huaj.

Në qarkun e Vlorës, 1,567 maturantë zhvillojnë sot provimin e parë të maturës, duke hapur kështu serinë e testeve kombëtare që do të zgjasin deri në fund të muajit.

Procesi i Maturës Shtetërore do të vijojë më 9 qershor me provimin e Gjuhës Shqipe dhe Letërsisë, më 16 qershor me Matematikën dhe do të përmbyllet më 23 qershor me provimin me zgjedhje.

Sipas Ministrisë së Arsimit, rregullat këtë vit janë mjaft të rrepta. Gjatë zhvillimit të testimit ndalohet rreptësisht përdorimi i telefonave celularë dhe orëve inteligjente (smartwatch).

Nxënësit duhet të kenë me vete një mjet identifikimi, kartë ID ose pasaportë, dy stilolapsa, një vizore të vogël dhe një makinë llogaritëse të thjeshtë. Testi i provimit zgjat dy orë e gjysmë.

Ministria e Arsimit u ka bërë thirrje maturantëve të respektojnë të gjitha rregullat e përcaktuara për mbarëvajtjen e procesit të testimit, ndërsa ky është provimi i parë i Maturës Shtetërore për këtë vit.