SPAK ka shpallur pretencën ndaj Samir Rosales Rodriguez, shtetas kolumbian i akuzuar si një nga figurat kyçe në skemën e laboratorit të kokainës në Frakull të Fierit, ku lënda narkotike dyshohet se ishte përzier me pleh organik.

Prokurori i çështjes, Adnan Xholi, i kërkoi gjykatës dënimin me 14 vjet burgim për Rodriguez, duke theksuar se ndaj tij po vijojnë procedurat për ekstradim.

Sipas hetimeve, Rodriguez dyshohet se kishte rolin e “kimistit” në operacion dhe se ka udhëtuar nga Kolumbia drejt Greqisë, më pas në Mal të Zi dhe në Shqipëri, ku mendohet se ka marrë pjesë në procesin e nxjerrjes dhe verifikimit të lëndës narkotike.

Hetuesit thonë se sasia e drogës së dyshuar në ngarkesë arrinte rreth 480 kilogramë kokainë, e fshehur në një dërgesë plehu organik që kishte mbërritur në Shqipëri në shtator të vitit 2022 dhe ishte transportuar më pas në zonën e Frakullës së Madhe.

Sipas SPAK, gjatë hetimeve është dokumentuar edhe një moment kyç, ku i pandehuri ka marrë një kampion nga ngarkesa, duke konfirmuar dyshimet se në materialin e importuar ndodhej kokainë e përzier.

Çështja tashmë i ka kaluar gjykatës, ndërsa autoritetet vijojnë procedurat për ekstradimin e tij.