Të paktën 12 persona janë qëlluar me armë gjatë një festivali komunitar në qytetin Toledo, në shtetin amerikan Ohio, në një incident që policia dyshon se ka qenë një shkëmbim zjarri mes disa personave.

Sipas autoriteteve, dy nga të plagosurit ndodhen në gjendje kritike, ndërsa policia po vijon kërkimet për të dyshuarit e përfshirë në ngjarje.

Zëvendësshefi i policisë së qytetit, Joe Heffernan, deklaroi se dyshohet për përfshirjen e të paktën dy personave.

“Me shumë gjasë po qëllonin njëri-tjetrin gjatë incidentit të së shtunës”, tha Heffernan.

Pamjet e publikuara në rrjetet sociale tregojnë qytetarë duke vrapuar për t’u strehuar, ndërsa ekipet e emergjencës u kanë dhënë ndihmën e parë të plagosurve në vendngjarje.

Një dëshmitar, Kevin Berry, i cili ndodhej në festival duke dëgjuar muzikë live në Agnes Reynolds Jackson Arboretum, tha se situata u përshkallëzua menjëherë.

“Po dëgjoja muzikë live kur u dëgjuan të shtënat dhe të gjithë u shtrinë përtokë”, u shpreh ai.