Një grabitje e dyshimtë ka ndodhur në një degë banke në Tiranë, ku një autor i paidentifikuar ka arritur të marrë rreth 60 mijë euro nga arka dhe më pas është larguar me skuter.

Ngjarja ka vënë në lëvizje Policinë dhe Prokurorinë e Tiranës, të cilat kanë sekuestruar dhe analizuar një sërë kamerash sigurie për të gjurmuar lëvizjet e autorit, ndonëse deri tani identiteti i tij nuk është zbuluar.

Sipas hetimeve paraprake, dyshohet se autori mund të ketë pasur bashkëpunim të mundshëm me një punonjës të bankës, për shkak të disa rrethanave të konsideruara të dyshimta gjatë momentit të ngjarjes.

Një nga elementët që po hetohet lidhet me deklarimet e punonjësit të sigurisë, Fehmi Ccullhaj, i cili ka pranuar në dëshminë e tij se:

“Isha në banjë, kur ndodhi grabitja e arkës së bankës. Derën e bankës nuk e mbylla nga brenda, pasi kam harruar instinktivisht…”

Sipas hetuesve, ngjarja ka ndodhur në momentin kur arkëtarët po menaxhonin valutën financiare, ndërsa në total janë dorëzuar rreth 60 mijë euro.

Grupi hetimor po shqyrton edhe mundësinë e një bashkëpunimi të brendshëm, pasi autori është shfaqur në ambiente të bankës në dy momente që konsiderohen të pazakonta nga hetuesit.

Deri më tani, më shumë se 5 persona janë shoqëruar për pyetje dhe më pas janë liruar, ndërsa ende nuk ka asnjë të arrestuar si autor i grabitjes.

Gjykata e Tiranës ka caktuar gjithashtu masën “arrest në shtëpi” për punonjësin e sigurisë, i cili akuzohet për “shpërdorim detyre”, ndërsa hetimet vijojnë për zbardhjen e plotë të ngjarjes.