Shqiptari Flamur S. është liruar nga burgu pas një marrëveshjeje për pranimin paraprak të fajësisë në një nga proceset më të mëdha të drogës të hetuara në Belgjikë.

Sipas mediave të huaja, marrëveshja u miratua të premten dhe parashikon një dënim prej pesë vitesh burg, nga të cilat dy vjet efektive, si dhe pagesën e 1.5 milionë eurove në favor të shtetit belg.

Menjëherë pas miratimit të saj, ai u lirua, pasi kishte vuajtur tashmë dy vite paraburgim në Turqi dhe Belgjikë.

Avokati i tij, Johan Van Genechten, konfirmoi arritjen e marrëveshjes, por nuk dha detaje mbi negociatat me prokurorinë federale.

Sipas autoriteteve belge, Flamur S. dyshohet se ka luajtur rol kyç në organizatën kriminale të lidhur me trafikantin Flor Bressers, i njohur me nofkën “Maradona”.

Ai akuzohet se drejtonte ekipet e ashtuquajtura “gërmues”, të cilët nxirrnin kokainën e fshehur në kontejnerë me mineral mangani, si dhe për menaxhimin e qarkullimit të miliona eurove brenda rrjetit kriminal.

Nga dokumentet hetimore rezulton se ai ka menaxhuar rreth 17 milionë euro pagesa në Belgjikë dhe Holandë.

Procesi gjyqësor ndaj të bashkëpandehurve të tjerë pritet të vijojë në muajt në vijim, ndërsa çështja e Flamur S. konsiderohet e mbyllur pas marrëveshjes me drejtësinë belge.