Një operacion i gjerë policor është zhvilluar gjatë orëve të natës në zonën e fshatrave të Lumit të Vlorës dhe më pas është shtrirë edhe në Fushë-Krujë, ku forcat speciale RENEA kanë ushtruar kontrolle në mbi 10 banesa me qëllim lokalizimin dhe arrestimin e shtetasit Sadik Llani.

Burime paraprake bëjnë me dije se gjatë ndërhyrjes janë shoqëruar dhe arrestuar disa persona, mes tyre edhe një individ i shpallur në kërkim ndërkombëtar. Policia ka sekuestruar katër armë zjarri dhe një mjet të blinduar, ndërsa operacioni është drejtuar nga drejtori i Policisë së Qarkut Vlorë, Edvin Ndreu, me pjesëmarrjen e forcave të shumta policore.

Sipas burimeve, kontrolli është shtrirë edhe në banesën e Sadik Llanit, por aty nuk është gjetur asnjë send i kundërligjshëm. Hetuesit dyshojnë për përgatitje të mirë organizuar dhe për këtë arsye është vlerësuar ndërhyrja e forcave elitë RENEA.

Në vijim të hetimeve, mësohet se shënjestra Ardian Baloshi ndodhej vetëm pak metra larg vendit të ngjarjes, në një banesë private. Sipas të dhënave paraprake, autori ka qëlluar nga një automjet tip “Benz”, fillimisht në distancë drejt Baloshit, dhe më pas është afruar duke vazhduar të qëllojë në breshëri.

Viktima, pasi është plagosur pranë një lokali, ka tentuar të largohet duke vrapuar drejt parkimit, ku është qëlluar sërish dhe ka ndërruar jetë në vendngjarje.

Policia ka bërë me dije se hetimet vijojnë për zbardhjen e plotë të rrethanave dhe për kapjen e autorit të dyshuar.