Një sulm i rëndë me thikë ka tronditur qytetin e Belfastit, ku një burrë ka mbetur i plagosur rëndë, ndërsa autoritetet kanë shtuar masat e sigurisë për shkak të protestave të paralajmëruara në zonë.

Sipas policisë, ngjarja ka ndodhur rreth orës 22:30 në veri të qytetit. Kur efektivët mbërritën në vendngjarje, gjetën autorin e dyshuar mbi viktimën, e cila ndodhej e shtrirë në rrugë, ndërsa pranë fytit të saj ishte një thikë.

Sulmi u ndërpre falë ndërhyrjes së disa kalimtarëve, të cilët arritën të neutralizonin agresorin deri në mbërritjen e forcave të rendit.

Viktima, një burrë i moshës 40 deri në 50 vjeç, ndodhet në gjendje të rëndë në spital. Ai ka pësuar lëndime serioze në sy, si dhe plagë në fytyrë dhe shpinë. Dëshmitarët kanë deklaruar se dëgjuan britmat e tij për ndihmë përpara se të transportohej me urgjencë nga ekipet mjekësore.

Në vendngjarje u gjet një thikë kuzhine, ndërsa policia arrestoi një burrë të moshës 30-40 vjeç, me origjinë nga Sudani dhe me leje qëndrimi në Mbretërinë e Bashkuar, i cili akuzohet për tentativë vrasjeje. Sipas autoriteteve, ai banonte në zonën ku ndodhi sulmi dhe më parë kishte jetuar në Dublin.

Hetuesit kanë bërë të ditur se deri më tani nuk ka asnjë indicie që ngjarja të ketë lidhje me terrorizmin, ndërsa motivet dhe rrethanat e plota të sulmit vijojnë të hetohen.

Policia ka vlerësuar rolin vendimtar të qytetarëve që ndërhynë për të ndihmuar viktimën, duke theksuar se reagimi i tyre i shpejtë mund të ketë shmangur pasoja edhe më të rënda.

Ndërkohë, përpara protestave të planifikuara në Belfast, autoritetet kanë bërë thirrje për qetësi dhe kanë njoftuar rritjen e pranisë së forcave të rendit në terren gjatë ditëve në vijim.