Prokuroria e Posaçme (SPAK) ka intensifikuar hetimet për një çështje që lidhet me dyshime për pastrim parash dhe përfitim të paligjshëm të pronave, duke bashkuar dy procedime penale të viteve 2025 dhe 2026 në një dosje të vetme hetimore.

Në kuadër të hetimeve, janë ushtruar kontrolle në disa ambiente dhe ndaj disa personave, ndërsa janë sekuestruar telefona celularë, laptopë dhe dokumentacion i ndryshëm që do t’i nënshtrohet verifikimeve të mëtejshme nga hetuesit.

Sipas SPAK, hetimet fokusohen te disa pasuri të paluajtshme për të cilat prej vitesh ekzistojnë konflikte dhe procese gjyqësore të vazhdueshme mes palëve që pretendojnë pronësinë.

“Në lidhje me këto pasuri ka konflikte të hershme dhe të vazhdueshme në kohë ndërmjet disa personave, banorë të zonës, të cilët pretendojnë përfitimin e këtyre sipërfaqeve me anë të AMTP-ve”, thuhet në qëndrimin e SPAK.

Sipas organit të akuzës, sipërfaqet e tokës rezultojnë të regjistruara fillimisht në emër të trashëgimtarëve të Artur Shehut dhe më pas në emër të vetë këtij shtetasi, ndërsa një pjesë tjetër figuron në emër të Ferdinant Sulajt, trashëgimtar i Seit Shehut.

Hetimet kanë zbuluar se një pjesë e pronave është transferuar më pas te Pullumb Petritaj, i cili, sipas SPAK, ka qenë përfaqësues i Seit Shehut në procese gjyqësore dhe administrative që lidhen me regjistrimin e pasurive.

Prokuroria thekson se konfliktet mbi këto prona vijojnë ende në gjykata dhe nuk ka vendime të formës së prerë për disa prej tyre. Madje, për një nga pasuritë objekt hetimi, vendimi i Gjykatës së Apelit Tiranë që kishte shërbyer për regjistrimin e saj është prishur nga Gjykata e Lartë.

Një tjetër element që ka ngritur dyshime për hetuesit lidhet me dokumentacionin e përdorur gjatë proceseve gjyqësore.

“Nga përmbajtja e këtyre vendimeve gjyqësore citohen edhe dokumente të përdorura përgjatë proceseve, të cilat kanë rezultuar të falsifikuara”, nënvizon SPAK.

Sipas organit të akuzës, në analizën e çështjes janë marrë në konsideratë edhe procese të tjera gjyqësore ku Pullumb Petritaj rezulton i dënuar ose i përfshirë në çështje që lidhen me falsifikimin e dokumenteve të pronësisë, me një skemë të ngjashme veprimi.

Hetimet vijojnë për të zbardhur origjinën e pasurive, mënyrën e përfitimit të tyre dhe për të verifikuar nëse janë konsumuar vepra penale që lidhen me pastrimin e parave, falsifikimin e dokumenteve dhe tjetërsimin e paligjshëm të pronave.