Një aksident i rëndë rrugor është regjistruar në orët e para të mëngjesit të së enjtes në fshatin Besi, në Prishtinë, ku si pasojë kanë mbetur të lënduar pesë persona.

Ngjarja është konfirmuar nga Policia e Kosovës, e cila bën me dije se aksidenti ka ndodhur rreth orës 01:00 të mëngjesit dhe në të janë përfshirë tre automjete në lëvizje.

Zëdhënësja e Policisë së Kosovës për rajonin e Prishtinës, Flora Ahmeti, ka dhënë detaje mbi ngjarjen.

“Sot rreth orës 01:00 kemi pranuar informatën se në fshatin Besi të Prishtinës ka ndodhur një aksident trafiku me lëndime. Në këtë aksident kanë qenë të përfshira tri automjete në lëvizje. Si pasojë e aksidentit janë lënduar pesë persona”, tha Ahmeti.

Të lënduarit janë dërguar për trajtim mjekësor, ndërsa nuk raportohet për rrezik për jetën e tyre në këtë fazë.

Autoritetet policore kanë nisur hetimet për të sqaruar shkaqet dhe rrethanat e plota të aksidentit.