Deputetja e Partisë Demokratike, Ina Zhupa, ka akuzuar Kuvendin se po miraton me procedurë të përshpejtuar projektligje që, sipas saj, janë të panevojshme, ndërsa nuk po trajtohen nisma të rëndësishme që lidhen me zonat e mbrojtura dhe kërkesat e institucioneve evropiane.

Gjatë një deklarate në Kuvend, Zhupa u shpreh se në rend dite nuk është futur kërkesa për shfuqizimin e ligjit për zonat e mbrojtura, të cilën ajo e cilësoi si një rekomandim të ardhur nga Parlamenti Evropian.

“E kanë trajtuar zhvillimin me konceptin: kur do Rama, kë do Rama, ku do Rama, si do Rama. Kjo nuk është as Siria evropiane me të cilën keni bërë fushatën dhe as Shqipëria që duan shqiptarët”, tha Zhupa.

Ajo shtoi se projektligji i datës 14 maj për shfuqizimin e ligjit për zonat e mbrojtura, sipas saj një kërkesë e Parlamentit Evropian, nuk ka ende një datë shqyrtimi në kalendarin parlamentar.

“Është një nga kërkesat e protestuesve për të mbrojtur zonat e mbrojtura, trashëgiminë natyrore dhe kulturore. Miratoni kalendar për gjëra të pavlera. Përgjigjjuni realitetit”, deklaroi ajo.

Në përfundim të fjalës së saj, Zhupa tha se “realiteti kërkon dorëheqjen e Edi Ramës” dhe një qeveri tranzitore, sipas saj, që do të rishikonte ligjet në funksion të interesit publik.