Shefi i grupit parlamentar të Partisë Socialiste, Taulant Balla, ka ironizuar deputetët e opozitës gjatë një deklarate në Kuvend, duke i quajtur ata “flamingo nga TEMU”, ndërsa ka paralajmëruar se 4 projektligjet e propozuara nga opozita do të rrëzohen.

Balla u shpreh se opozita po ndryshon qëndrime sipas tij në mënyrë të paqëndrueshme, ndërsa theksoi se mazhoranca është e vendosur për të vijuar projektet e zhvillimit.

“Ky ishte fiks një fjalim, një flamingo nga TEMU dhe më pëlqen shumë që keni disa ditë që ju zogjtë e bufit ju duket vetja si flamingo… kush ju ka komanduar ju, kush ju ka autorizuar, bëni zhurmë sa të doni”, tha Balla.

Ai shtoi se projektligjet e opozitës nuk do të kalojnë dhe se qeveria është e vendosur për të vijuar me investimet e planifikuara, përfshirë edhe atë në Zvërnec.

“Sa u përket 4 ligjeve që keni sjellë, jemi kundër! 4 projektligjet që keni sjellë do t’i rrëzojmë sepse jemi votuar për ta zhvilluar Shqipërinë”, deklaroi ai.

Balla theksoi gjithashtu se Shqipëria, sipas tij, nuk ka kohë për vonesa në procesin e integrimit europian dhe duhet të ecë përpara pa ndërprerje.

“4 projektligjet tuaja do të rrëzohen kurdo që të jetë data, projekti në Zvërnec do të vazhdojë dhe Shqipëria do të ecë përpara drejt BE”, përfundoi ai.