Gjatë protestës së zhvilluar dje në Tiranë, një pensionist ka reaguar ashpër ndaj vendimit të qeverisë për alokimin e 4 milionë eurove nga fondi i emergjencave për organizimin e koncertit të reperit Kanye West në kryeqytet.

I moshuari krahasoi fondet e akorduara për organizimin e koncertit me situatën ekonomike të pensionistëve shqiptarë, duke ngritur akuza për mënyrën e përdorimit të parave publike.

Sipas tij, qeveria po neglizhon nevojat e qytetarëve, ndërsa shpenzon miliona euro për aktivitete të tilla.

“Edi Rama ka filluar këto xhirot e famshme në Europë dhe me fodullëkun më të madh dhe mospërfillje i jep 4 miliardë lekë një rrepisti rrjepacak atje nga fondi i emergjencave, dhe unë e kam pensionin 112 mijë lekë. Nuk i jep lekë Edi Rama atij rrepistit dhe të mos fusë lekë në xhep, ajo nuk diskutohet,” u shpreh pensionisti gjatë protestës.

Deklarata e tij u bë pjesë e reagimeve të qytetarëve që morën pjesë në tubimin kundër qeverisë, ku u ngritën edhe shqetësime për nivelin e pensioneve dhe përdorimin e fondeve publike.