Gjatë protestës së zhvilluar në Tiranë kundër kryeministrit Edi Rama, qytetarët vijuan të shprehin pakënaqësitë e tyre për situatën ekonomike dhe, sipas tyre, keqqeverisjen e vendit.

Një protestuese deklaroi se shqiptarët përballen çdo ditë me vështirësi në shërbimet publike dhe me mungesë mbështetjeje nga institucionet, ndërsa, sipas saj, diferenca mes jetës së qytetarëve dhe asaj të politikanëve po bëhet gjithnjë e më e madhe.

“Fakti që ne çdo ditë ndihemi të braktisur, nuk shikojmë që kemi përkrahje si qytetarët e këtij vendi, e kemi për detyrë të dalim në protestë. Të hipësh në autobus, duhet të presësh e të ngjeshësh. Arsimi? Infrastruktura nuk është e mirë, stafi nuk është i mirë. Nëpër spitale është e njëjta gjë. Shikojmë diferencë mes jetëve të qytetarëve dhe politikanëve. Këto janë vështirësitë që ne përballemi. Shikon që ndërtohen kulla, por e ke të pamundur të blesh një shtëpi. Me çmimet që janë, janë shumë të larta, më është dashur që të shkoj diku larg qendrave që të mos paguaj shumë”, u shpreh ajo.

Protestuesja komentoi edhe vendimin e qeverisë për akordimin e 4 milionë eurove për organizimin e koncertit të Kanye West, duke e cilësuar atë si një veprim të papranueshëm.

“Është ulëritëse dhe përçmuese ndaj qytetarëve. Çdo gjë tjetër mund të ishte bërë me 4 milionë euro në Shqipëri. Për të mbushur koncertin po dhuroheshin bileta për nxënës dhe kjo është skandaloze. Çmimi i biletës për teatrin ku çoj vajzën është trefishuar”, deklaroi ajo gjatë protestës.