Franca po përballet me një valë të fortë të nxehti ekstrem, ndërsa nëntë departamente do të vendosen në nivelin e alarmit të kuq nga mesdita e sotme.

Sipas autoriteteve meteorologjike, 76 departamente të tjera mbeten nën nivelin e alarmit portokalli për shkak të temperaturave të larta dhe rrezikut të shtuar nga pasojat e motit ekstrem.

Në rajonin e Parisit, si dhe në disa zona të Francës qendrore dhe perëndimore, temperaturat mëngjesin e sotëm kanë qenë mes 22 dhe 25 gradë Celsius, ndërsa gjatë ditës pritet që termometri të arrijë deri në 41 gradë.

Krahas temperaturave të larta, autoritetet kanë paralajmëruar edhe për rrezik të shtuar nga zjarret në pyje. Sipas të dhënave, 59 departamente janë të ekspozuara ndaj një rreziku “të lartë ose shumë të lartë” për përhapjen e zjarreve.

Në departamentin Drôme, në juglindje të vendit, prefekti ka urdhëruar evakuime të mëtejshme parandaluese, duke prekur rreth 400 persona në një zonë malore ku zjarret kanë përfshirë rreth 3.500 hektarë tokë.

Shërbimet meteorologjike bëjnë me dije se vala e të nxehtit pritet të arrijë kulmin mes së dielës dhe së hënës dhe të vijojë të paktën deri më 15 korrik.

Sipas parashikimeve, ajri më i freskët oqeanik nga Atlantiku pritet të sjellë ulje të temperaturave nga data 16-17 korrik.

Ndërkohë, alarmi i kuq është hequr për rajonin Languedoc-Roussillon në jug të Francës, pasi rikthimi i flladeve detare ka ndikuar në uljen e temperaturave.