Një operacion i Guardia di Finanza në Itali ka çuar në sekuestrimin e më shumë se 111 kilogramëve kokainë, rreth 19 mijë eurove cash dhe arrestimin e tre personave, mes tyre edhe një shtetas shqiptar.

Aksioni u zhvillua nga efektivët e Komandës Provinciale të Ankonës, të cilët kishin vënë në vëzhgim një automjet të dyshimtë që lëvizte nga Ankona drejt zonës periferike të Parmës.

Gjatë ndjekjes, hetuesit konstatuan një shkëmbim të dyshimtë çantash të mëdha mes automjetit dhe një kamioni që ishte afruar pranë tij. Pas kontrollit të mjeteve, autoritetet zbuluan se lënda narkotike ishte fshehur në një hapësirë të posaçme të krijuar në kabinën e kamionit.

Brenda saj u gjetën 100 pako kokainë, me peshë totale mbi 111 kilogramë.

Sipas vlerësimeve të Guardia di Finanza, nëse sasia e sekuestruar do të përpunohej dhe hidhej në treg, ajo do të sillte përfitime të paligjshme që arrijnë rreth 20 milionë euro.

Me urdhër të Prokurorisë së Parmës, u arrestuan dy personat që ndodheshin në automjet dhe drejtuesi i kamionit. Sipas autoriteteve, të tre personat janë me origjinë shqiptare dhe rumune.

Të arrestuarit janë dërguar në burgun e Parmës, ndërsa hetimet vijojnë për të zbardhur të gjithë rrjetin e dyshuar të trafikut të drogës dhe personat e tjerë të përfshirë.