Një ngjarje e rëndë është regjistruar mëngjesin e sotëm në zonën e Liqenit të Thatë në Tiranë, ku një grua rreth 45-vjeçe dyshohet se ka humbur jetën pasi është mbytur.

Sipas informacioneve të Policisë së Tiranës, rreth orës 07:10, shërbimet e Stacionit të Policisë Farkë janë njoftuar se dyshohej se një shtetase ishte vetëhedhur në liqen.

Menjëherë pas marrjes së njoftimit janë angazhuar polumbarët e RENEA-s, të cilët nisën kërkimet në ujërat e liqenit.

Pas rreth dy orësh kërkime, rreth orës 09:00, polumbarët bënë të mundur gjetjen e trupit të pajetë të shtetases me inicialet M. T., rreth 45-vjeçe.

Në vendngjarje ka mbërritur grupi hetimor, i cili po kryen veprimet e nevojshme për zbardhjen e plotë të rrethanave dhe dokumentimin ligjor të rastit.