Policia e Shkodrës ka finalizuar operacionin e koduar “Kalibri”, në kuadër të të cilit është arrestuar një 21-vjeçar, pasi gjatë kontrollit në banesën e tij janë gjetur armë zjarri dhe një sasi e konsiderueshme municioni.

Sipas njoftimit zyrtar të Policisë, operacioni u zhvillua pas administrimit të informacioneve të siguruara gjatë punës operative, me qëllim parandalimin e veprimtarive të paligjshme dhe garantimin e rendit e sigurisë publike.

Në pranga u vu shtetasi Roberto Malocaj, 21 vjeç, banues në fshatin Trush.

Gjatë kontrollit të ushtruar në banesën e tij, shërbimet e Policisë sekuestruan katër armë zjarri, konkretisht një automatik, një pushkë dhe dy armë gjahu, si dhe një sasi të konsiderueshme municioni.

Armët dhe municionet u sekuestruan në cilësinë e provës materiale dhe janë dërguar në Institutin e Policisë Shkencore për ekzaminime të mëtejshme.

Policia vijon veprimet hetimore për dokumentimin e plotë të rrethanave dhe përgjegjësisë ligjore të personit të arrestuar.