Është rënduar bilanci i aksidentit tragjik të ndodhur në rrethrrotullimin e TEG-ut, në Tiranë, ku një betoniere doli nga rruga dhe u rrëzua nga lartësia e mbikalimit.

Burime bëjnë me dije se ka ndërruar jetë në spital edhe personi i dytë që ndodhej në betoniere, ndërsa viktima tjetër u konfirmua e pajetë në vendngjarje.

Sipas burimeve nga Policia, dy personat që udhëtonin në betoniere ishin shtetas të huaj, të cilët kishin mbërritur në Shqipëri me kontrata pune.

Nga aksidenti ka mbetur i plagosur edhe drejtuesi i një automjeti tip Audi, Roland Nuri, i cili është transportuar në spital dhe, sipas burimeve, ndodhet në gjendje të qëndrueshme shëndetësore.

Policia dhe grupi hetimor vijojnë punën për zbardhjen e plotë të shkaqeve dhe dinamikës së aksidentit.