Detaje të reja kanë dalë nga ngjarja e rëndë e regjistruar mëngjesin e sotëm në fshatin Vidhisht, në Roskovec, ku 35-vjeçari Refit Buzi dyshohet se vrau ish-vjehrrin e tij, plagosi ish-vjehrrën dhe më pas u largua nga vendngjarja së bashku me ish-të fejuarën.

Vëllai i viktimës ka deklaruar se autori i dyshuar kishte kërcënuar prej kohësh familjen, duke pretenduar se krimi ishte i paramenduar.

“Dëgjuam vetëm zhurmë dhe që bërtisnin brenda. Ne nuk mund të hynim sepse nuk kishim armë. Ai thoshte: ‘Ejani se do t’ju vras të gjithëve’. Policia ka ardhur pas një ore. E mori djali në telefon. Autori ishte i armatosur. Doli nga dritarja, nga pjesa e pasme e shtëpisë, sepse e kishte lënë aty makinën. Mori dhe çupën me vete dhe iku”, u shpreh ai.

Sipas tij, ish-e fejuara e autorit jetonte me familjen e saj dhe marrëdhënia mes çiftit kishte qenë problematike prej kohësh.

“Vajza qëndronte këtu. Kishin vite të fejuar, por kishin probleme. Ka shkuar 3 herë në polici, është arrestuar. Shkoi në Tiranë para disa muajsh me armë lodër dhe e futën brenda. Tani ishte në arrest shtëpie, kërcënonte gjithmonë. I thoshte vajzës: ‘Ti do të vish tek mua, pa mua ti nuk e bën dot jetën’. Bënte shantazhe. Kjo ishte një vrasje e paramenduar”, deklaroi vëllai i viktimës.

Ndërkohë, Policia vijon kërkimet për kapjen e 35-vjeçarit dhe po heton për zbardhjen e plotë të rrethanave të ngjarjes. Autoritetet nuk kanë konfirmuar ende zyrtarisht pretendimet e familjarëve lidhur me motivin e krimit apo rrethanat e largimit të ish-të fejuarës.