Kryebashkiaku i qytetit Temoac, në shtetin Morelos të Meksikës qendrore, është vrarë nga persona të armatosur brenda ambienteve të ndërtesës së bashkisë.

Prokuroria e shtetit njoftoi se Valentin Lavigne, kryebashkiak i Temoac dhe anëtar i partisë në pushtet MORENA, u gjet i pajetë nga policia brenda zyrave të institucionit që drejtonte.

Sipas raportimeve të mediave lokale, Lavigne kishte qenë më herët objekt i një atentati në muajin janar, por kishte arritur të mbijetonte.

Autoritetet meksikane kanë nisur hetimet për zbardhjen e rrethanave të ngjarjes dhe identifikimin e autorëve, ndërsa deri tani nuk janë bërë publike detaje mbi motivin e mundshëm të sulmit.

Shteti Morelos konsiderohet një nga zonat ku veprojnë grupe të fuqishme të trafikut të drogës dhe prej vitesh përballet me nivele të larta dhune të lidhur me aktivitetin kriminal.

Vrasja e Lavigne ka rikthyer vëmendjen te rreziku që përballojnë zyrtarët vendorë në Meksikë. Që prej vitit 2006, kur vendi hyri në një periudhë përshkallëzimi të luftës kundër karteleve të drogës, dhjetëra zyrtarë lokalë janë vrarë.

Një nga rastet më të bujshme ishte vrasja e kryebashkiakut të Uruapanit, Carlos Manzos, në fund të vitit 2025, i cili u ekzekutua gjatë një aktiviteti publik pasi kishte kundërshtuar hapur kartelet e drogës.