Zjarret masive kanë detyruar autoritetet franceze të evakuojnë mijëra banorë dhe turistë në zonat pranë Gjirit të Arcachon, ku flakët kanë përfshirë mijëra hektarë tokë.

Sipas autoriteteve, rreth 12 mijë persona janë larguar tashmë nga zonat e rrezikuara, ndërsa vijon procesi i evakuimit për rreth 8,800 banorë dhe turistë të tjerë. Deri tani, zjarret kanë shkatërruar afro 3,100 hektarë sipërfaqe pranë këtij gjiri.

Pjesa më e madhe e personave të evakuuar janë turistë që po qëndronin në kampingjet e gadishullit Lège-Cap-Ferret, ndërsa masa parandaluese janë marrë edhe në fshatin Claouey.

Prefektja e Girondës, Sophie Brocas, bëri të ditur se deri tani nuk janë raportuar persona të lënduar, ndërsa disa rrugë dhe zona pyjore janë mbyllur për të garantuar sigurinë e qytetarëve.

Shefi i zjarrfikësve të Girondës, Marc Vermeulen, deklaroi se ekipet kanë punuar pa ndërprerje gjatë gjithë natës për të vënë nën kontroll flakët, por paralajmëroi se situata mbetet e vështirë për t’u parashikuar për shkak të temperaturave të larta dhe ndryshimeve të drejtimit të erës.

Bilanci i zjarreve në Francë është rënduar edhe nga humbjet njerëzore. Dy zjarrfikës kanë humbur jetën gjatë javës teksa po luftonin një tjetër vatër zjarri pranë aeroportit të Bordeaux. Ministri i Brendshëm francez, Laurent Nuñez, shprehu ngushëllimet për familjet e tyre dhe vlerësoi sakrificën e efektivëve.

Situata e zjarreve vijon të jetë shqetësuese edhe në vende të tjera të Evropës Jugore. Në Itali, një zjarrfikës humbi jetën gjatë operacionit për shuarjen e flakëve në Siçili, ku janë regjistruar mbi 350 vatra zjarri.

Autoritetet italiane dyshojnë se pjesa më e madhe e këtyre zjarreve mund të jetë shkaktuar nga veprimtaria njerëzore, ndërsa temperaturat ekstreme dhe thatësira kanë favorizuar përhapjen e shpejtë të flakëve.