Policia e Vlorës ka dhënë informacion zyrtar lidhur me aksidentin e ndodhur pasditen e sotme në det, ku një 17-vjeçar ka mbetur i plagosur gjatë lundrimit.

Sipas njoftimit paraprak të autoriteteve, ngjarja ka ndodhur rreth orës 16:50, kur një mjet lundrues me drejtues shtetasin E. I., 32 vjeç, po lundronte nga Gadishulli i Karaburunit në drejtim të molit të Vlorës.

Gjatë lundrimit, pasagjeri S. Ç., 17 vjeç, dyshohet se ka rrëshqitur dhe ka rënë në pjesën e motorit të mjetit lundrues, duke pësuar dëmtime në këmbë.

Pas aksidentit, i mituri është transportuar me ambulancë drejt Spitalit Rajonal të Vlorës, ku ndodhet nën kujdesin e mjekëve.

Policia ka bërë me dije se grupi hetimor, nën drejtimin e Prokurorisë, ka nisur veprimet procedurale për të zbardhur plotësisht rrethanat e ngjarjes dhe për të përcaktuar dinamikën e aksidentit.