Karim Adeyemi ka nisur me shumë entuziazëm aventurën e tij te Barcelona, ku në prezantimin e parë para mediave foli për objektivat e tij me klubin katalanas, përshtatjen në Spanjë dhe bashkëpunimet që pret të krijojë në skuadër.

Sulmuesi gjerman u shpreh se një nga prioritetet e tij do të jetë mësimi i gjuhës spanjolle, por beson se përshtatja nuk do të jetë problem.

“Do të më duhet të mësoj spanjishten, por nuk besoj se do ta kem të vështirë, sepse gjuhët më shkojnë mirë”, tha Adeyemi.

24-vjeçari foli edhe për idhullin e tij te Barcelona, duke veçuar një prej legjendave më të mëdha të klubit, Lionel Messin.

“Lojtari më i mirë që kam parë ndonjëherë është Messi. Për mua ka qenë gjithmonë Messi. Gjithashtu më ka pëlqyer shumë edhe Ronaldinho”, u shpreh sulmuesi.

Adeyemi komentoi edhe partneritetin që pret të ndërtojë me talentin e Barcelonës, Lamine Yamal, duke vlerësuar cilësitë e tij në fushë.

“Ai është një lojtar i jashtëzakonshëm. Shënon, driblon dhe krijon raste. Unë përfitoj nga pasimet e bashkëlojtarëve, ndaj besoj se mund të funksionojmë shumë mirë së bashku”, deklaroi ai.

Sulmuesi gjerman pranoi se ishte surprizuar kur mori vesh për interesimin e Barcelonës, duke theksuar edhe ndikimin e trajnerit Hansi Flick në transferimin e tij.

“Nuk mund ta besoja, sepse sezoni im i fundit nuk ishte më i miri. Flick më tha se më donte në ekip, por se duhej të jepja maksimumin. Është një nder i madh të jem pjesë e Barcelonës”, përfundoi Adeyemi.

Transferimi te Barcelona shihet nga lojtari si një mundësi e re për të rikthyer formën më të mirë dhe për të luajtur një rol të rëndësishëm në projektin e klubit katalanas.