Një zbulim i rëndësishëm speleologjik është regjistruar në Parkun Kombëtar të Llogarasë, ku gjatë një ekspedite në shpellën “Sterra e Kujunxhiut” është zbuluar një zgavër e re me thellësi rreth 70 metra.

Sipas eksploruesve, hapësira e zbuluar është pothuajse tërësisht vertikale dhe përbën një pjesë të re të strukturës së shpellës, e cila deri më tani nuk ishte e dokumentuar.

Në fund të kësaj zgavre është gjetur një grumbull i madh gurësh, i cili dyshohet se ka bllokuar vijimin e mëtejshëm të galerisë së shpellës. Ekspertët pritet të kryejnë studime të tjera për të përcaktuar nëse ekzistojnë dalje apo ambiente të tjera të fshehura pas këtij bllokimi natyror.

Gjatë ekspeditës është evidentuar gjithashtu prania e një numri të madh eshtrash të kafshëve të egra, përfshirë derrin e egër, drerin, ujkun dhe dhelprën.

Ky zbulim konsiderohet me rëndësi për dokumentimin e pasurive natyrore dhe speleologjike të zonës, ndërsa pritet të shërbejë si bazë për ekspedita të reja dhe studime të mëtejshme mbi shpellën “Sterra e Kujunxhiut” dhe biodiversitetin e Parkut Kombëtar të Llogarasë.