Ndërsa kryeministri Edi Rama flet për ndryshime në administratë dhe për një “besë” të re me qytetarët, kritika të forta kanë ardhur nga një ish-funksionar i Partisë Socialiste.

Ish-kryetari i PS në Korçë, Muharrem Meko, ka reaguar përmes një postimi në rrjetet sociale, duke akuzuar qeverinë Rama për gjendjen e administratës shtetërore dhe duke e cilësuar atë si më problematiken në historinë e shtetit shqiptar.

Meko shkruan se administrata aktuale është “më e keqja në 114 vite shtet”, ndërsa e lidh atë me largimin e të rinjve nga vendi dhe problemet e tjera sociale e ekonomike.

“Oooo i Modh! Askujt mos iu anko; ti je përgjegjësi i vetëm për këtë zallamahi e çorbë që ke gatuar nën logon; Administrata Shtetërore …e që mjerë kujt i bie të ketë punë e të zgjidhë hall me të!”, shkruan ai në postimin e tij.

Ish-kreu socialist në Korçë thekson se kritikat e tij ndaj administratës i ka bërë edhe më herët publikisht, duke e akuzuar atë për korrupsion dhe mungesë profesionalizmi.

“Personalisht jam shprehur hapur e prej kohësh se, në historinë 114-vjeçare të shtetit shqiptar, administratë të korruptuar e analfabetë të këtij standardi si kjo e sotmja, as ka patur e as do të ketë!”, deklaron Meko.

Në reagimin e tij, ai përmend edhe administratat e mëparshme, duke e krahasuar situatën aktuale me atë të qeverive të kaluara dhe duke kritikuar përzgjedhjen e njerëzve në poste publike.

Sipas Mekos, problemet e vendit nuk lidhen vetëm me administratën, por edhe me korrupsionin, mungesën e drejtësisë, largimin e të rinjve dhe çështje të tjera që, sipas tij, kanë ulur besimin e qytetarëve ndaj institucioneve.

“Kjo qeveri ka larguar edhe të rinjtë nga vendi, kurse përgjegjës për këtë situatë është vetëm kryeministri”, shprehet ai.

Reagimi i Mekos vjen pas deklaratave të kryeministrit Rama për reformimin e administratës shtetërore, në një kohë kur qeveria po përballet me kritika politike dhe protesta të vazhdueshme.