Një përplasje e fortë mes kryeministrit Edi Rama dhe deputetit socialist Erion Braçe raportohet të ketë ndodhur pas mbledhjes së përbashkët të qeverisë dhe grupit parlamentar të Partisë Socialiste, ku në qendër të diskutimeve ishte sjellja e administratës ndaj qytetarëve dhe protesta disa mujore në Bulevardin e Tiranës.

Gjatë monologut të tij më shumë se një orësh për “protestuesit e Flamingove”, Rama e vendosi theksin te fjala “arrogancë”, duke kritikuar nëpunësit e administratës për mënyrën se si, sipas tij, komunikojnë me qytetarët.

Kryeministri argumentoi se kjo sjellje ka ndikuar në pakënaqësinë e qytetarëve dhe në protestat që kanë vijuar prej dy muajsh në kryeqytet.

Por, sipas kritikëve të tij, vetë fjalimi i Ramës u shoqërua me tone të ashpra dhe me një qëndrim që u interpretua si arrogant. Ai deklaroi se nuk do të tërhiqet nga projektet e tij të debatueshme dhe nuk pranoi kërkesën kryesore të protestuesve për ndryshime politike.

Debati me Braçen pas mbylljes së kamerave

Sipas burimeve të brendshme të raportuara, pas përfundimit të pjesës publike të takimit dhe pasi kamerat u fikën, deputeti socialist Erion Braçe ka marrë fjalën nga vendi ku ishte ulur dhe ka kritikuar qasjen e kryeministrit ndaj administratës.

Braçe është shprehur se problemi i arrogancës nuk nis vetëm nga administrata, por nga mënyra se si funksionon drejtimi i institucioneve dhe emërimet në poste kyçe.

Sipas tij, Partia Socialiste ka vendosur në pozicione të rëndësishme persona që, sipas tij, nuk kanë lidhje organike me strukturat e partisë dhe nuk mbajnë përgjegjësi përpara elektoratit socialist.

“Nuk kam pse të mbyll gojën unë. Ju na sillni njerëz pa u konsultuar, për t’u emëruar në poste të rëndësishme dhe kërkoni t’i votojmë. Por, duke sjellë njerëz të tillë, pa konsultë, krijoni pakënaqësi te njerëzit dhe gjendemi përballë këtyre situatave”, mësohet të ketë thënë Braçe.

Sipas raportimeve, kjo deklaratë ka acaruar Ramën, i cili i është përgjigjur deputetit me fjalët:

“Mbylle gojën!”

Braçe, sipas të njëjtave burime, nuk është tërhequr nga replika dhe ka vijuar kritikën ndaj mënyrës së funksionimit të strukturave qeverisëse.

Tensionet dhe ndërhyrja e Ballës

Rama më pas ka reaguar duke mbrojtur emërimet e qeverisë, duke deklaruar se shumë prej tyre lidhen edhe me kërkesat e Bashkimit Evropian.

“Ata janë verdikti i qeverisë. Ç’të bëj që na e kërkon BE-ja? Se nuk e sillnim fare në Kuvend”, raportohet të ketë thënë kryeministri.

Sipas burimeve, debati ka vijuar dhe situata është tensionuar deri në ndërhyrjen e kreut të Grupit Parlamentar Socialist, Taulant Balla, i cili ka kërkuar një pushim disa minutësh për qetësimin e situatës.

Pas rikthimit të qetësisë, Rama ka vijuar për pak momente takimin dhe më pas është larguar nga salla.

Sipas raportimeve, takimi nuk është mbyllur me drekën e përbashkët të planifikuar për ministrat dhe deputetët socialistë.

Kritikat ndaj ministrave dhe deputetëve

Gjatë takimit, Rama raportohet se ka pasur kritika edhe ndaj disa ministrave dhe deputetëve për mënyrën e komunikimit publik.

Ai ka kërkuar nga deputetët që shqetësimet dhe kritikat t’i diskutojnë brenda strukturave partiake dhe jo vetëm në biseda private.

Kryeministri është rikthyer gjithashtu te kritikat për atë që e ka cilësuar “luftë bërrylash” brenda Partisë Socialiste, duke paralajmëruar se përplasjet mes socialistëve dëmtojnë imazhin e partisë.

Heshtja e Spiropalit

Një tjetër element që ka tërhequr vëmendjen gjatë takimit ka qenë heshtja e Elisa Spiropalit.

Pas përplasjes së mëparshme me kryeministrin në një mbledhje të grupit parlamentar, ku Rama e kishte kritikuar publikisht për mungesën në votime dhe sjelljen e saj politike, Spiropali këtë herë nuk ka ndërhyrë në debat.