Analisti politik Afrim Kasolli ka komentuar vendimin që seanca konstituive e Kuvendit të Kosovës të mbahet më 6 gusht, vetëm një ditë para përfundimit të afatit kushtetues. Sipas tij, caktimi i seancës në fund të afatit nuk është një befasi, duke pasur parasysh deklaratat e ushtrueses së detyrës së presidentes, Albulena Haxhiu, se partive politike do t’u jepej më shumë kohë për të arritur një marrëveshje për formimin e institucioneve të reja.

Megjithatë, Kasolli ka vlerësuar se pritja për konsensus mund të jetë vetëm arsyeja e bërë publike, ndërsa pas vendimit mund të fshihen edhe kalkulime politike, veçanërisht nga partia fituese.

“Motivet mund të jenë të tjera, mund të jenë edhe kalkulime politike, veçanërisht të partisë fituese. Besoj kështu pasi mund të presin edhe dinamikat e subjekteve tjera, veçanërisht në LDK, pasi po i shohim telashet që ekzistojnë në këtë subjekt politik”, ka deklaruar Kasolli.

Sipas tij, mungesa e takimeve të reja dhe e përpjekjeve serioze mes subjekteve politike për të arritur një marrëveshje e vë në pikëpyetje argumentin se shtyrja e seancës është bërë vetëm për t’u dhënë më shumë kohë partive.

Paralajmërimi për zgjedhje të reja

Kasolli ka paralajmëruar se nëse Kuvendi nuk arrin të konstituohet brenda afatit kushtetues, Kosova mund të përballet me zgjedhje të jashtëzakonshme.

Ai e ka cilësuar këtë skenar si të papranueshëm, duke theksuar se vendi do të përballej për herë të katërt me zgjedhje të jashtëzakonshme dhe do të tregonte, sipas tij, mungesë të pjekurisë politike.

Analisti ka nënvizuar se aktualisht Kosova po përballet me mungesë të institucioneve funksionale me mandat të plotë, duke përmendur Kuvendin dhe Qeverinë. Ai u ka bërë thirrje partive politike që të lënë mënjanë interesat partiake dhe të fokusohen në funksionimin e institucioneve.

Kasolli ka paralajmëruar gjithashtu për pasojat financiare dhe politike të zvarritjes së krijimit të institucioneve, duke thënë se Kosova tashmë ka humbur rreth 40 milionë euro nga mbështetja e lidhur me procesin e integrimit evropian dhe mund të humbë edhe fonde të tjera në të ardhmen.

Nrecaj: “Nuk kemi kryetar të vendit, nuk kemi Kuvend, nuk kemi Qeveri”

Edhe juristi Anton Nrecaj ka ngritur shqetësimin për situatën institucionale në Kosovë, duke theksuar rëndësinë e funksionalizimit të organeve shtetërore.

“Nuk kemi kryetar të vendit, nuk kemi Kuvend, nuk kemi Qeveri dhe të gjitha janë me ushtrues detyre”, ka deklaruar Nrecaj.

Sipas tij, kjo gjendje cenon rendin juridik dhe funksionimin e shtetit, ndërsa u ka bërë thirrje partive politike që të përmbushin përgjegjësitë e tyre dhe të konstituojnë institucionet.

Nrecaj ka kërkuar që interesat partiake dhe përplasjet politike të lihen mënjanë, duke theksuar se prioritet duhet të jetë funksionimi i Republikës së Kosovës.

Ai ka paralajmëruar edhe për pasojat ekonomike të bllokadës institucionale, duke thënë se vendi ka humbur rreth 40 milionë euro nga mbështetja e lidhur me procesin e integrimit evropian.

“Prandaj, interesi është jo vetëm integrimi evropian, por edhe që institucionet e Kosovës përfundimisht, pas dy viteve, të jenë funksionale”, ka përfunduar Nrecaj.