Policia e Shtetit ka publikuar një apel të rëndësishëm për të gjithë qytetarët, duke paralajmëruar për një skemë të re mashtrimi kibernetik që synon marrjen e kontrollit të llogarive të aplikacionit WhatsApp.

Sipas njoftimit zyrtar, janë konstatuar raste të qarkullimit të mesazheve dhe lidhjeve (linkeve) mashtruese, të cilat përdoren nga autorët për të mashtruar përdoruesit dhe për të marrë akses në llogaritë e tyre.

Mashtruesit përdorin pretekste të ndryshme, si ftesa për të votuar në konkurse online ose kërkesa për konfirmimin e një veprimi. Pasi përdoruesi klikon mbi linkun, i kërkohet të vendosë kodin 6-shifror të verifikimit të WhatsApp.

Sipas Policisë, ky kod përdoret nga autorët për të regjistruar llogarinë në një pajisje tjetër, duke marrë kontrollin e plotë të saj dhe duke përjashtuar përdoruesin e ligjshëm nga aksesi.

Policia e Shtetit u bën thirrje qytetarëve:

* Mos klikoni në linke të dyshimta, edhe nëse dërgohen nga persona të njohur;
* Mos ndani kurrë kodin 6-shifror të verifikimit të WhatsApp me askënd;
* Aktivizoni funksionin Two-Step Verification (Verifikimi me dy hapa) në aplikacionin WhatsApp;
* Nëse dyshoni se llogaria juaj është komprometuar, veproni menjëherë për rikuperimin e saj dhe njoftoni kontaktet tuaja.

Në përfundim të njoftimit, Policia e Shtetit u bën apel qytetarëve të tregojnë kujdes maksimal ndaj mashtrimeve kibernetike.

“Mbroni të dhënat tuaja! Kujdesi juaj është mbrojtja më e mirë ndaj mashtrimeve kibernetike”, thuhet në njoftimin zyrtar.