A mund të lindin ndjenja romantike mes një njeriu dhe një inteligjence artificiale? Një studim i ri në Shtetet e Bashkuara sugjeron se kjo ide po bëhet gjithnjë e më reale për një pjesë të përdoruesve.

Një anketë e zhvilluar me 2.000 të rritur amerikanë zbuloi se 11% e tyre kanë zhvilluar biseda flirtuese ose romantike me chatbot-e të inteligjencës artificiale, si Claude, ChatGPT dhe Google Gemini.

Sipas studimit të realizuar nga Talker Research, 12% e të anketuarve thanë se një bisedë me një chatbot të inteligjencës artificiale u ka shkaktuar eksitim seksual.

Rezultatet tregojnë se fenomeni është më i përhapur te të rinjtë. Mbi një e katërta e pjesëtarëve të Gjeneratës Z (27%) deklaruan se kanë zhvilluar biseda me përmbajtje romantike ose seksuale me chatbot-e të inteligjencës artificiale, ndërsa po aq thanë se janë ndier seksualisht të eksituar nga këto ndërveprime.

Me rritjen e moshës, kjo prirje bie ndjeshëm. Rreth 16% e Millennials raportuan biseda romantike me inteligjencën artificiale, krahasuar me 9% të Gjeneratës X dhe vetëm 2% të brezit të lindur pas Luftës së Dytë Botërore.

Studimi evidenton gjithashtu një dallim mes gjinive. Rreth 15% e burrave thanë se kanë flirtuar me një chatbot të inteligjencës artificiale, kundrejt 8% të grave. Po ashtu, 17% e burrave raportuan se janë eksituar seksualisht nga këto biseda, ndërsa kjo përqindje ishte 9% te gratë.

Anketa ngriti edhe pyetjen nëse flirti me inteligjencën artificiale mund të konsiderohet tradhti në një marrëdhënie. Rreth 24% e amerikanëve u shprehën se po, ndërsa te Gjenerata Z kjo përqindje arrin në 36%, të cilët besojnë se krijimi i një marrëdhënieje romantike me një chatbot mund të jetë arsye për t’i dhënë fund një lidhjeje.

Sipas studimit, shumë amerikanë besojnë se kjo prirje do të rritet në të ardhmen. Plot 44% mendojnë se njerëzit do të krijojnë më shumë marrëdhënie emocionale me inteligjencën artificiale, ndërsa 16% parashikojnë një rritje edhe më të madhe të këtyre lidhjeve.