FIFA ka reaguar pas sqarimeve të fundit të IFAB-it (International Football Association Board), organit që harton dhe interpreton rregullat e futbollit, lidhur me përdorimin e sistemit VAR në rastet e gabimit të identifikimit të lojtarëve.

Në një deklaratë për mediat, një zëdhënës i FIFA-s bëri të ditur se organizata ka qenë në komunikim të vazhdueshëm me IFAB-in dhe se interpretimi i zbatuar gjatë Kupës së Botës është konsideruar i vlefshëm.

“Ne kemi marrë parasysh komentet e IFAB-it. Kemi qenë në komunikim me ta gjatë gjithë kohës dhe na kanë konfirmuar se ky interpretim është i pranueshëm, është pritur pozitivisht dhe do të jetë pjesë e diskutimeve për rishikimin e protokollit të VAR-it, siç u diskutua edhe në mbledhjen e fundit vjetore”, deklaroi zëdhënësi i FIFA-s.

Debati u nxit pas çerekfinales së Kupës së Botës mes Argjentinës dhe Zvicrës, ku Breel Embolo u ndëshkua me karton të kuq pas ndërhyrjes së VAR-it.

Sipas IFAB-it, vendimi ishte rezultat i një interpretimi të gabuar të rregullores, pasi protokolli për gabimin e identifikimit zbatohet vetëm kur arbitri ndëshkon lojtarin e gabuar për një faull të kryer nga një futbollist tjetër dhe jo në rastet e simulimit.

Megjithatë, FIFA këmbëngul se interpretimi i përdorur gjatë Botërorit ka qenë i njëjtë në të gjitha rastet dhe se ndërhyrja e VAR-it kishte si qëllim korrigjimin e një gabimi faktik.

Sipas organizatës, pati dy raste gjatë turneut ku një lojtar u identifikua gabimisht si autor i një faulli për karton të verdhë dhe VAR-i ndërhyri për të korrigjuar situatën, pasi shkaku ishte simulimi i kundërshtarit.

“Simulimi në vetvete nuk mund të rishikohet nga VAR-i dhe nuk duhet të çojë në ndëshkimin disiplinor të një kundërshtari, pasi kjo mund të sjellë pasoja të mëtejshme, si karton i kuq për shkak të dy kartonëve të verdhë ose pezullim për grumbullim kartonësh. Nuk besojmë se ka pasur gabim nga arbitri apo VAR-i dhe mendojmë se vendimi shërbeu për të rikthyer drejtësinë në fushë”, theksoi FIFA.