Milani i Ruben Amorim vijon përgatitjet për sezonin e ri 2026/27, teksa muaji korrik i ka shërbyer skuadrës për të hedhur bazat e projektit të ri me trajnerin portugez.

Kuqezinjtë kanë zhvilluar seanca intensive stërvitore dhe dy teste miqësore, fillimisht ndaj ekipit Futuro dhe më pas kundër Celtic, ku arritën të rikuperonin disavantazhin për të barazuar 2-2 në transfertë.

Tashmë për Milanin nis faza më intensive e përgatitjeve, me një turne ndërkontinental që do ta çojë skuadrën në Australi dhe Azi për disa përballje prestigjioze.

Më 5 gusht, kuqezinjtë do të zbresin në fushë në Perth të Australisë për derbin veror ndaj Interit, ndërsa tri ditë më vonë, më 8 gusht, do të përballen me Chelsean në Xhakartë të Indonezisë.

Axhenda e miqësoreve do të mbyllet më 15 gusht në Bratislavë, ku Milani do të sfidojë Manchester United në një duel me simbolikë të veçantë për Ruben Amorim, i cili do të përballet me ish-klubin e tij.

Këto ndeshje do t’i shërbejnë Milanit për të qenë në formën optimale për debutimin zyrtar në Serie A 2026/27, i planifikuar për mbrëmjen e 23 gushtit në transfertën ndaj Torinos.